“Sürəti artırmaqla əldə edilən vaxt qənaəti risk və xərclərlə müqayisədə çox kiçikdir” – PROFESSOR

Sadə bir riyazi düstur sürət həddinin aşılması zamanı sürücülərin düşündüyü “vaxt qazancı”nın əslində nə qədər mənasız olduğunu ortaya qoyur. 

Magistral yollarda sürətin 150 kilometr-saatadək artırılmasının müzakirə edildiyi Çexiyada riyaziyyat professoru Stanislav Ştefan sadə hesablamalarla göstərib ki, sürəti artırmaqla əldə edilən vaxt qənaəti risk və xərclərlə müqayisədə çox kiçikdir.

Onun hesablamasına görə, 100 kilometrlik məsafəni 130 kilometr-saatla qət etmək təxminən 46 dəqiqə vaxt aparır. Sürəti 140 kilometr-saatadək qaldırdıqda bu yol cəmi 43 dəqiqəyə tamamlanır və qazanc yalnız 3 dəqiqə təşkil edir. Əgər sürət 150 kilometr-saat olarsa, məsafəni qət etmək üçün 40 dəqiqə kifayət edir ki, bu da normal sürətlə müqayisədə sadəcə 6 dəqiqə qənaət deməkdir.

Mütəxəssislər bildirirlər ki, bir neçə dəqiqəlik bu cür qənaətin əvəzində sürücülər həm ciddi stress və yorğunluğa, həm də daha böyük qəza riskinə məruz qalırlar. Çünki yüksək sürətlə idarə olunan avtomobilin sürücüsü beyninə daha çox informasiya yükləyir və səhv ehtimalı xeyli artır. Üstəlik, sürət həddinin aşılmasına görə tətbiq edilən cərimələr və yanacaq sərfiyyatının çoxalması da məsələni maliyyə baxımından mənasız edir.

Mütəxəssislərin yekun qənaəti ondan ibarətdir ki, yolda qazanılan bir neçə dəqiqə heç vaxt sürücünün həyatını riskə atmağa dəyməz.