Maşındakı bu ehtiyat hissəsi 80000 “probeq”dən sonra yoxlanılmalıdır - ARAŞDIRMA

Son illərdə avtomobil sənayesində tətbiq edilən yeni texnologiya – “yaş vaxt kəməri” sistemi mühərriklərin ömrünü ciddi şəkildə azalda bilər.

Son 8 ildə istehsal edilən bir çox avtomobildə istifadə olunan bu sistemin 10 ildən artıq dayanıqlı olmadığı, nəticədə mühərrikin sıradan çıxması və avtomobilin hurdaya çevrilməsi riski yaratdığı məlum olub.

2017-ci ildən etibarən bir çox avtomobil istehsalçısı ənənəvi vaxt kəmərlərinin əvəzinə “yaş vaxt kəməri” (Bio belt) adlanan sistemdən istifadə etməyə başlayıb. Bu mexanizmdə kəmər mühərrikdən kənarda deyil, karterin içərisində yerləşir və mühərrik yağı ilə daim təmasda olur. İstehsalçılar bu üsulun yanacaq sərfiyyatını azaltmaq, sürtünməni minimuma endirmək və emissiyaları aşağı salmaq üçün nəzərdə tutulduğunu bildirirlər.

Lakin mütəxəssislərin sözlərinə görə, bu sistemin ciddi çatışmazlıqları da var. “Yaş kəmər”lər ənənəvi kəmərlərlə müqayisədə daha qısaömürlüdür və təxminən 10 il və ya 100 min kilometrdən sonra köhnəlməyə başlayır. Təcrübəli mexaniklər bildirirlər ki, bu komponentin sıradan çıxması mühərrikin tam dayanmasına və bəzən avtomobilin təmirə yararsız hala düşməsinə səbəb olur.

“Yaş vaxt kəməri qırıldıqda, mühərrikin bir çox hissəsinə zərər dəyir. Bu da avtomobilin demək olar ki, bərpasını mümkünsüz edir”, – mütəxəssislər xəbərdarlıq edirlər. Onların sözlərinə görə, bu problem çox zaman istehsalçının zəmanət müddətindən sonra baş verdiyinə görə, avtomobil sahibləri təmir xərclərini özləri ödəməli olurlar.

Bundan əlavə, “yaş kəmər” sistemlərinin təmiri və dəyişdirilməsi adi vaxt kəmərlərinə nisbətən xeyli bahalıdır. Əgər klassik sistemlərdə dəyişmə prosesi bir neçə saat çəkirsə, yeni nəm sistemlərdə bu iş iki dəfə çox vaxt aparır və xərci də yüksək olur.

Avtomobil təşkilatlarının məlumatına görə, bu kəmərlərdə ən çox rast gəlinən problemlər şişlik, diş qırılması, delaminasiya və qırılmadır. Belə hallarda kəmərin qırıntıları mühərrikin içərisinə daxil olaraq tam mexaniki nasazlığa səbəb ola bilər.

Mütəxəssislər 2017-ci ildən sonra istehsal olunan avtomobil sahiblərinə xəbərdarlıq edirlər:

“Yaş kəmərinin vəziyyəti 80-100 min kilometrdən sonra mütləq yoxlanılmalıdır. Əgər bu prosesə laqeyd yanaşılarsa, mühərrikin zədələnməsi qaçılmazdır və nəticədə onun tam dəyişdirilməsi lazım gələ bilər.”

Beləliklə, “yaş vaxt kəməri” texnologiyası yanacaq qənaətinə fayda versə də, uzunmüddətli perspektivdə avtomobil sahibləri üçün ciddi risklər yaradır.

(avtosfer.az)